“Shkolla Shqipe” në Weinfelden hap dyert për fëmijët shqiptarë
Autor i shkrimit :Vaxhid Sejdiu
“Shkolla Shqipe” në Weinfelden, kantoni i Thurgaut, hap dyert për fëmijët shqiptarë me të vetmin qëllim: që ata të mësojnë dhe të ruajnë gjuhën shqipe – gjuhën e nënës. Mësimi i gjuhës amtare është një pjesë thelbësore e identitetit dhe kulturës tonë, sepse ai ndihmon fëmijët që të kuptojnë rrënjët e tyre, të lidhen me historinë dhe traditat e familjes, dhe të ndihen krenarë për origjinën e tyre.
Në mes të obligimeve të shumta të përditshme, njëri ndër detyrimet kryesore për familjet shqiptare në Zvicër është të kujdesen që fëmijët e tyre të mësojnë rregullisht gjuhën shqipe dhe ta ruajnë atë si një pasuri të çmuar kulturore. Në këtë kuadër, Shkolla Shqipe në Weinfelden ofron kushte shumë të mira mësimore, me klasa moderne dhe të pajisura sipas standardeve të shkollave zvicerane, që garantojnë një mësim të kënaqshëm dhe efektiv për çdo nxënës.
Në këtë pikë shkollore, mësuesja e dalluar Anila Borova punon me përkushtim për të udhëhequr nxënësit në rrugën e mësimit të gjuhës shqipe. Ajo gjithashtu ka marrë mbështetjen e Drejtorisë së shkollës në Weinfelden, e cila ndihmon në organizimin dhe zhvillimin e aktiviteteve mësimore, duke krijuar një ambient të sigurt dhe stimulues për fëmijët.
Shkolla Shqipe gjithashtu përfitoi nga mbështetja e institucioneve të Arsimit të Shqipërisë dhe Kosovës, të cilat ofrojnë tekstet shkollore më të fundit dhe materiale mësimore të përshtatura për fëmijët shqiptarë në diasporë. Tashmë librat janë gati, dhe nxënësit mund të fillojnë menjëherë të mësojnë gjuhën shqipe në mënyrë të rregullt dhe cilësore.
Edhe nxënësit e parë të klasës, si Vlera, Leandra, Arti, Luisi dhe Diari, tregojnë përkushtim dhe gëzim në mësimin dhe ruajtjen e gjuhës amtare. Ata ftojnë moshatarët e tyre shqiptarë që t’u bashkohen dhe të mësojnë së bashku gjuhën tonë të bukur shqipe.
Ju ftojmë të gjithëve në Shkollën “Martin Haffter” në Weinfelden.
🌟 Ejani, nxënës shqiptarë, të mësojmë gjuhën tonë të dashur së bashku dhe të ruajmë pasurinë më të çmuar të identitetit tonë!
